Bitoon

Nagpatalubo ako
nin nagkapirang tinanom sa natad -
mga banhi nin nagbuburak na tanom.
Inataman ko nin husay,
dinugdog ni tubig
kun namamate ko na siring
na sana an paha kan mga gamot.

Nagdukhay nin hararom,
nagrarom
asin nagrarom lalo
an mga ugat kaini sa daga -
sa kada muklat-turog
nin saldang asin bulan.

Tuminambo ini nin husay
hastang nagsupang
an mga enot na sanga
asin matutunganga ako
habang dinadalan an tinanom
na nagbabayle sa duros.

Pirang ekis na man
an sakuyang naitatak sa kalendaryo
kan luhay-luhay, sarong aldaw -
pag-hakay ko asin paghunat,
nakisabay man an mga burak
na napagmata sa halawig na turog.

Pagbungkaras ko sa kutson,
sinir'ip sa bintana an mga tanom
sa sakuyang natad
kan pukawon an sakuyang mga mata
asin kalag kan nahiling -
mga estrella na narakdag hale sa langit!

Nagkikirimat-kimat sa laad nin saldang
asin an pahamot, minahapihap
sa sakuyang dungo;
mga kalyo asin lugad sa kamot
na naging mga estrella
na nagliliwanag, pamukaw-kalag.

Uminagi an sakuyang amigo
asin napapundo para makisumaro
sa sakuya sa pagpiyesta
nin samuyang mga mata
sa nakahatag na tanawon -
mga estrellas na nagliliwanag sa aldaw.

Bulan an naka-agi
bago nagturugpaan sa sakuyang natad
an mga bitoon sa langit.
Kaparehong aldaw,
paghuraw nin saldang sa sulnupan,
hahabason man an mga bitoon.