Bente Uno

Padikit-dikit na nagdiklom an kalangitan
kan an dati nang harayong saldang
napuho sa kalangitan asin dagos na nawara.

Matanga na asin tuninong sa kapalibotan
pero an karampal sa daghan garo daguldol
na dae ako pinapaturog.

Kada minuto garo taon kun umagi
na sa pagal ko kahahalat
ako napapirong asin nakaturog.

Maribok pa sa hukragong an laog kan isip.
Turog ngani ako pero an kalag ko
pukaw sa kapungawan sa katuninongan.

Nagimata ako sa batok nin ayam,
sa kayas asin tilaok nin manok.
Nag-agi na man an para tinapay.

Pag muklat ko kan sakuyang malsok,
maliwanag pero dae nakakasilaw.
Arog kaini an buhay aro-aldaw.

-dyan kay ben-
06/22/09